पिंपरी-चिंचवड राष्ट्रवादी काँग्रेस (शरदचंद्र पवार) पक्षाच्या शहराध्यक्षपदी देवेंद्र तायडे यांची नियुक्ती करण्यात आली आहे. ही नियुक्ती पक्षाचे राष्ट्रीय अध्यक्ष शरद पवार यांच्या मान्यतेने करण्यात आली आहे. शिरूर लोकसभा मतदारसंघाचे खासदार डॉ. अमोल कोल्हे यांनी तायडे यांच्या नावाची सूचना केली होती.
प्रदेशाध्यक्ष आमदार शशिकांत शिंदे यांनी ही नियुक्ती केली. पक्षाचे राज्य सरचिटणीस रवींद्र पवार यांच्या हस्ते मुंबईतील पक्षाच्या मुख्यालयात देवेंद्र तायडे यांना नियुक्तीपत्र देण्यात आले. पक्षाचे राज्य सरचिटणीस आणि पिंपरी-चिंचवडचे निरीक्षक सुनील माने यांनी या संदर्भात माहिती दिली.
माने यांनी सांगितले की, देवेंद्र तायडे यांचा संघटनात्मक अनुभव पक्षासाठी फायदेशीर ठरेल. त्यांच्या नेतृत्वाखाली शहर संघटना अधिक मजबूत होईल आणि कार्यकर्त्यांना सार्वजनिक प्रश्न सोडवण्यासाठी योग्य मार्गदर्शन मिळेल, असा विश्वास त्यांनी व्यक्त केला. राष्ट्रीय कार्याध्यक्षा सुप्रिया सुळे, राज्य सरचिटणीस रोहित पवार आणि माजी मंत्री हर्षवर्धन पाटील यांच्याशी झालेल्या चर्चेनंतर हा निर्णय घेण्यात आल्याचेही नमूद करण्यात आले आहे.
